ANDING-ANDINGEN
Turi-turin, Ndung-ndungen, Doah (Didong),
Mangmang, Pedah-pedah, ”Perngandungen” bage pe Anding-andingen (perumpaman),
e me erbage-bage kesemalen adat ibas
ngaturken kata jadi belas-belas si mehuli
guna nehken kata ajar, pengalamen tah pe ketangkasen, ibas kalak Karo si genduari enda
enggo mulai bene ras erkiteken si e lanai megati ipake jelma si genduari.
Kinibayaken kesemalen siadi e
situhuna rugi adi sempat masap, apai ka adi ergancihken kemusilen kesemalen
budaya si deban, seumpama ”rap” ibas bangsa Negro nari tah pe lagu-lagu ”batu
ging-ging” (rock) i bas bangsa-bangsa Eropah nari.
Pustaka Sibadia jine ncidahken, maka
erbage-bage sastra lit itengah-tengah
kalak Israel, umpamana: legenda
(turi-turin), sejarah, puisi, hukum, ramalan
(pertendungen), saga (turi-turin
kerna kinimbisan), cerita lucu
(jagar-jagar, kanam-kanam), surat, pidato
(cakap simbelin), kepentaren ibas nggeluh, kisah
panggilan (turi-turin penabalen), kisah
mukjizat bag epe wahyu
(ketangkasen). Adi si perdiateken alu
megermet, situhuna kesemalen kalak Israel e ndeher enteh pe narus bali nge ras
kesemalenta kalak Karo ibas masa-masa siadi.
Adi siperdiateken alu megermet, anding-andingen e banci ipelain ku terpuk-terpukna, e me kap:
1. Anding-andingen (perumpaman) ibas tempas
belas-belas ”siniiandingken” guna ”siniikataken”, umpamana: ”bagi si ngersak
kambing, beritana ngersak tapi nahe erdalin”, ”bagi cingkam i tengah kerangen,
asa metua ladat kiskisen”, ”bagi endek tupung las wari, molah-olah la ertinali,
cibal la ringan", ”bagi kaperas lau mambang, lenga galang pe enggo piran, ”bagi
tinaruh ibas gargar, la ermata la ercuping, la ertan la ernahe, epe petiktik,
apaika kita manusia si ermata ras ercuping, erbabah, ertan ras ernahe", ras
si debanna.
2. Anding-andingen ibas tempas leben
”si niikataken” e maka iterusken ”si iandingken”, umpamana: ”sukar, adi lalu
peniwet duri”, ”muat beritana bagi si ngersak kambing”, ”marpar merap bagi
kotor kambing bas ben wari” ras seterusna.
3. Anding-andingen ibas tempas ija belas-belas ibassa
”siniiandingken” ras ”siniiandingken saja, ”sini atena ikatakenna, si megi-megi singukurkensa, umpamana: ”bagi
galuh si leuh, matahna tasak, tasakna macik”, siageng-agengen radu mbiring,
sikuning-kuningen radu megersing”.
4. Anding-andingen ibas tempas ija belas-belas ibassa
”siniikataken” ras ”siniikataken”, umpamana: ”adi ngalo la rido, ugape nggalar
ka la rutang”, ”seribu gia pande kudin, talu nge ibahan sekalak saja pande
kah-kah", ”anceng pitu kuta”, ”baling-baling tetap ngalaken angin” ras
si debanna.
Adi serpenulih kita ku Pustaka Sibadia, anding-andingen si nggeluh ibas kesemalen kalak
Israel me si ipake Jesus jadi kinibayaken ibas Ia nehken kataNa, umpamana banci
sinehen ibas Mrk 4:1-20, Mat. 18: 21-35, Mat 25:14-30 bage pe ibas Luk.15:1-22 ras tentu melala denga si debanna.
Anding-andingen e selaku belas-belas
simehuli, adi ndube ikataken cakap si rorat, gunana e me kap gelah kata ajar,
pengalamen tah pe pedah-pedah si niikataken, melukah ipepanken ibas pusuh,
erkesah guna igermeti janah melukah ka ngeralinggungikensa kempak kalak si deban
jadi sada pengajaren.
Salu bage ibas masa siadi, tua-tuanta tuhu-tuhu enggo
makeken kiat ibas ngerana: metenget megi berita, megermet nehken berita, la
mastiken si la pasti ras pentar muat erti.
Engkai maka manusia-manusia jaman
si genduari enggo salih ibas ngerana si megati cakap tekas akapna maka payo si
maun-mauan la terbedaken apai belas-belas apai perkas!
Iteruh enda, isuratken kami
piga-piga anding-andingen, siniiarapken jadi persinget banta
nginget-nginget anding-andingen
sideban gelah terbuen jadi kinibayaken belas-belasta.
”Bagi babi elah kenca
man nundalken pelangkah”: kalak si tupung la perlu, minter nundalken teman
enteh pe orangtuana.
”Bagi
babi, sangap mupus liah ngajar”: ikataken kerna kalak si enterem anak ipupusna
tapi la ngasup ngajarkensa.
”Erbuat bengket bagi
tutup abal-abal”: kalak si susah erkiteken perbahanenna jine.
”Runggun si rembang
abu”: runggun si la erpepah, la jelas ija benanana ija pendungina.
”Bagi cingkam ngagahken
beratna”: ituriken kempak kalak mecembua, nganggarken si la lit ertina.
”Bagi ajek-ajek beru
ginting”: mejile, rapat lanai terpilasi.
”Bagi singalaken
matawari”: perbahanen si sia-sia, ngelawan kalak si tuhu-tuhu mbisa.
”Bagi babi malar-malar
anakna”: ituriken kempak perbulangen/ndehara si la sahun sirang erkiteken
ngukurken nasib anakna jine.
”Bagi angguk i tengah
berngi”: la niakap man perdiatenken erkiteken ibelasken tupung la sentudu
paksana.
”Aras jadi namo, namo
jadi aras”: nuriken kerna pergeluh si la tetap. Kalak si mbisa banci ndabuh jadi
kalak si meteruk, kalak si meteruk banci jadi mbisa.
”Ate tungir asa
lagan”: kalak si la nandai bana.
”Ate ngerauk njemput pe
lang”: merangap.
”Bagi nangka ronding,
bagi jambe Juhar”: gelgel-gelgel saja tading i peken lalit si mbabasa ku jambur
(ku pelaminen).
”Bagi ranting gara, si
gara nge maka igestungken”: pengurus/serayan si rajin nge si isuruh-suruh ras
maun-maun i junguti enteh pe irawai.
”Bagi beru ginting,
elah man maka nggiling”: kalak si la ngeteh paksa si sentudu ibas ncibalken
sada perbahanen si mehuli.
”Labo tergurui buaya
erkeneng, la man ajaren markisah nggawang”: ula ajari kalak si beluh ibas
baginna.
”Bagi beru Tarigan
beluh ngagaki, nakan temue si lenga reh pe enggo itanggerna”: tutus ras
erpengagak.
”Teraku-aku bagi tai
megulang”: ngaku-ngaku aku, piah dat kesuliten.
”Bagi singalis padang,
ialis tambah serbutna”: Ate ngelayani, nambahi kiniserbuten.
”Bagi ancit, adi sirang
sitedehen, jumpa sitaguten, piah ersada bas gebuk api”: kalak ersenina si
lenge, jumpa-jumpa i pengadilen.
”Giring-giring tutup
tumbana, sabah siantar tengah galungina, mbiring-mbiring gia rupana, babahna
mbacar pengupulina”: Gia lit kurangna, lit ka kelebihenna.
”Kucing nangko
beltu-beltu, kambing ipekpeki”: lain sisalah, lain si niiukum.
”Balik-baliken bagi
bulung salagundi”: lain kata pedempak, lain kata petundal.
”Iluh mambur bagi
tangge-tangge banban nguda: la erngadi-ngadi ngandung.
”Labo diberu mejile
si man daramen, pentang gia gelah erpengidah, pasek gia gelah erpemegi, cempang
gia gelah beluh erdalin”: seakatan parasna perlu sigermeti pe pengkebetna.
Bage me sitik si ngasup aku
nuriken kerna anding-andingen asa pemetehku
lit. Ngaku nge aku maka aku pe manusia sigenduari nge
simaun-maun labo lepas ibas ngerana salu
telkas ka. Tapi arah kita si singeten si lupanta ras-ras, mbera-mbera banci ka
ras-ras kita terulin ku wari-wari pepagin arah ngerana sue ras oratna kita
nggeluh, emaka reh masinnalah kata siniibelas ras mejuah-juah kita kerina kerina si ngogesa. Bujur.
Tidak ada komentar:
Posting Komentar