PINAKA SEKERAJANGEN

PINAKA SEKERAJANGEN

 Adi sigermetti bicara siadi, jarang me sibegi cakap ibelasken kerna si ngataken sekerajangen alu umputen ku ntah ngku entah pe na, tapi lalap ibelaken kata rikutken umputen ta tah pe nta.

 Bapanta, nandenta, anak(-anak)ta, bere-berenta, permenta, bagem maka niakap cakap si tengteng, si payo ras si mehamat, labo ibelasken alu nina mamaku, mamiku, niniku tah pe bulangku, kempu(-kempu)ku, bibiku ntah ka pe bengkilaku.

Kune cakap ibelasken alu umputen ndu, contana bibindu, bengkilandu, mamindu tah pe mamandu, sitangkas si niantusi ije  labo kerna pekalak-kalak, tapi kiniersadan sabap arah si e teridah sada pengendesen maka kam si empuna: kam simada bibi, bengkila mami tah pe mama.

  Adi arus kata nibelasken alu kata ku tah pe ngku, contana: Enda me sekerajangenku, antusen cakap e labo guna nuduhken kerna pinaka sekerajangenna subuk ibas orat tutur  entah pe ibas dampar si deban tapi kepeken kerna perdalan geluh entah pe kerna padan pengindo. 

 

Seakatan kerna perkade-kaden tah pe persima-siman rikutken orat tutur, ibas ngataken kerna erta-erta pe, nina tua-tua siadi: rumahta, pekenta, geretanta, lembunta, labo rumahku, pekenku, geretangku tahpe lembungku.  Adi ibelasken pe aku umputen na, contana rumahna, jumana, biasana cakap enda biasana nuduhken kekelengen, kalimbubu simada rumah tahpe taneh tapi anak beru si make entehpe si ibere kalimbubu e jadi buat-buatenna.

Nina Pa Bahung, dua ngenca kata nibelas nuduhken sekerajangen si  la tengka adi iumputi kata nta tah pe ta, emekap diberu ras rondong.  Sabap alu ninta diberunta ras rondongta, makin kerina kari si jadi empuna?.  Tapi adi sigemetti terbagesen, situhuna cakap enda terjeng kanam-kanam tahpe jagar-jagar saja nge.  Labo pernah sekali pe ndube nikataken bage, tapi nina bage pe ninta: nande kemberahenta, impalta tahpe kakandu, agindu, rikutken ganjang-teruk tutur si ngerana ku si temanna ngerana.

Palas-palas kegeluhen kalak Karo sipepantek Pinaka Sekerajangen

Kegeluhen kalak Karo ibas persadan sangkep nggeluh erpalasken Rakut si Telu (Kalimbubu, Sembuyak ras Anak beru), Merga si Lima (Karo-karo, Ginting, Sembiring, Perangin-angin ras Tarigan), Tutur si Waluh (Sembuyak, Senina, Senina Siparibanen, Seninan Sepemeren, Anak Beru, Anak Beru Menteri, Kalimbubu ras Puang Kalimbubu) dingen perkade-kaden si Sepuludua (tambah sada nina Nempel Tarigan, e me kap Teman Meriah/Perpulungen/Teman Sejawat).

Ibas kalak Karo (ndube) kegeluhen idalanken salu ras-ras, subuk ras-ras serumahen ibas rumah adat empat/enem/waluh jabu si ipanteki ibabo kesain kuta eme taneh ras-ras, bagepe nggeluh erkiteken ras-ras erdahin ibas juma, peken, sabah alu ras-ras, dingenape arah perkakas-perkakas si niusahaken ras-ras.  

 Bage pe kerina lako-lakon rikutken lengkaren kegeluhen, iukurken, irunggui dingen ilakoken ras-ras.  E maka uga banci nina enda rumahku, jumangku, sabahku ras si debanna?  (Lanai tole sukar ndarami salihen kata pribadi tah pe privacy ibas cakap Karo sabab mungkin labo lit  si e ibas kamus cakap Karo).

Erbage Juma Erbage Pagena, Erbage Jelma Kuh Erbagena

Adi erbanding-banding kita ku kalak Inggis tah pe kalak Belanda, sidat me maka tuhu-tuhu pelain me pegerana kalak Karo ras kalak enda. My...(sekerajangenku), your...(Sekerajangenndu), his...(sekerajangenna ia dilaki), her...(Sekerajangenna ia diberu), its...(sekerajangen rubia), your...(sekerajangenndu ras-ras), our...(sekerajangenta) ras their...(sekerajangenna ras-ras).   

Tuhu pinaka sekerajangen e ibelat-belat alu pasti sue ras terpukna, bagepe ibas cakap Belanda, Bezittelijk voornaamwoord (Pinaka Sekerajangen), emekap: mijn... (sekerajangenku), Uw/jouw/je... (sekerajangenndu), hem... (sekerajangenna ia dilaki), haar...(sekerajangenna ia diberu), ons/onze...(sekerajangen kami, jullie...(sekerajangenndu ras-ras) ras hun...(sekerajangen kalak ah).  Apai ka ibas bahasa Latin, sikubegi nina kalak, teptep kata banci salih ku duabelas bentuk sue ras gendangna.  

 E maka kai ninta kerna si e? Jababna Erbage juma erbage pagena, erbage jelma kuh erbagena, pas bas ia sabap payo bas ia, payo bas kita sabab bage ka turah ras nggeluh ibas adat budayanta.

Nta ras ta salih jadi ku tah pe ngku?

La terbuali, la lit si la salih (er-ubah-ubah) i babo doni enda seakatan si salih (perubahen) e jine. Si ndube kitik salih ku belinna, si ndube anak perana ras singuda-nguda salih jadi perbapan ras pernanden, si ndube enggo metua salih jadi mate, emaka si teridah salih jadi si la teridah.   

Bage me pe adi ndube lalit belas-belas kerna pinaka sekerajangen si la iumputi salu kata ta ntah pe nta, genduari enda enggo manjar-anjar salih jadi ku tah pe ngku. Jumanta salih jadi jumangku sabab enggo kugelem surat ras bukuna, Rebanta jadi rebana, sabab enggo idayakenndu alu sinik-sinik, idahndu aku tempa akapndu aku begu).

 

Ngkai maka ta tah pe nta salih ku ku tah pe ngku?  Nina H. Spencer, tep-tep kegeluhen ras-ras lit me perbeben altruisme (kiniras-rasen) ras egoisme (sekalak-sekalakak, akungku), ras dua palas perukuren si siawin-awinen ras si jemba-jemban e, enggo mbolen ku egoisme, banci jadi alu la sengaja i sekolah si aloken sampah-sampah pemeteh: my book, your book, their house, huis van hen, huis van Uw, ini buku Budi, itu buku Badu, rumah Maya cantik ras umputenna piah enggo iajari jadi anak-anakta jadi pekalak-kalak.  

 Mungkin pe Orangtuanta jine enggo mulai sukar niakapna adi tupung motong manuk buen ibagi-bagi asangken iakapi ibas jabuna, piah pala-palaina erbahan rumahna sekalak-sekalak. Manjar-anjar  “nta” salih jadi “ngku”!