SIDALIH-DALIHEN, SISIMBAK-SIMBAKEN NTAH SIHAMAT-HAMATEN?
(Nggermeti Runggun Pemenan Cakap Kalimbubu
Ibas KerjaTumbuk Erjabu)
Penaruh
Ibas tep-tep kerja
tumbuk Erjabu, tupung mata kerja ija isehken kehamaten nangdangi kalimbubu arah
pedalin kerina tembe-tembe bagi si enggo irungguken dingen ilakoken ibas
runggun, e me runggu ndungi adat nereh-empo, iterusken ka ku lakon ngerana lako
nehken-ngaloken kata mejuah-juah ras telah-telah subuk ibas tegun sukut,
kalimbubu rikut ras puang bage pe ibas anak beru, anak beru menteri seh ku anak beru si ngukuri.
Biasana, perlebe lakon
ngerana ilakoken ibas biak si empo arah
petangar-tangar kata ras senina-seninana, ibas teran-teran: senina, senina
sepemeren, senina si paribanen, senina sepengalon tukur bage pe senina si sendalanen ku
kalimbubu. Iterusken kalimbubu si ngalo ulu emas, e me kalimbubu si telu-telu
dalanen, kalimbubu sepemeren bege pe kalimbubu si perdemui raduken si ngalo perkempun e me pe si telu-telu dalanen ras kerina si tergelar kalimbubu
si ngalo ciken-ciken
nehken kata pemasu-masun. Janah itutup teran anak beru sukut si mada lakon.
E maka isehken ka paksa kempak
biak si nereh, ibenai alu
petangar-tangar kata ras senina-seninana e me ka ibas teran-teran: senina,
senina si pemeren, senina si paribanen, senina si pengalon tukur ras senina
erkiteken sendalanen ku kalimbubu. Kenca dung teran sukut iterusken ka
kalimbubu si
ngalo
bere-bere e
me
kalimbubu sitelu-telu sendalanen, kalimbubu seperen ras kalimbubu si perdemui, kerinasi tergelar
kalimbubu si
ngalo
bere-bere nehken kata pasu-pasu raduken ras puang kalimbubu e me kalimbubu sitelu-elu dalanen
si tergelar kalimbubu si ngalo perninin. E maka dungna itutup alu teran
anak beru si nereh eme si tergelar anak beru, anak beru menteri seh ka ku anak beru
si ngukurina.
Tupung teran kalimbubu
iiyahken protokol lako pajek cinder guna nehken kata pasu-pasu, subuk ibas
teran kalimbubu singalo ulu emas si cinder raduken kalimbubu si ngalo perkempun, bage pe tupung tedis ka kalimbubu si ngalo bere-bere raduken puang
kalimbubu simada lakon e me si tergelar si ngalo perninin, tangkas matanta ngidah maka kalimbubu e
runggu janahna cinder.
Tempa-tempa
sidalih-dalihen, sisimbak-simbaken gelah ise si perlebe ngerana, janah teran
apai ka kin si biak si ngumputisa janah tupung kalimbubu e runggu lako mbenai
cakap, megati si begi
cakap: ”Endam kepe bena-benana maka kita
kalak Karo la maju-maju, ngerana saja pe sidalih-dalihen, sisimbak-simbaken,
ntah maun kin labo lit si pang?” Tapi kenca lit simbenaken cakap, maka kerina enggo
erdalan alu mehuli, metunggung dingen ertorosen bagi gula Gajah.
Sidalih-dalihen,
Sisimbak-simbaken tah Sihamat-hamaten?
Payo kin kalimbubu e
ibas runggu menaken cakap, ia sidalih-dalihen tah pe si simbak-simbaken? Payo
kin kalimbubu e, e me
ibas teran kalimbubu si ngalo ulu emas raduken ras kalimbubu si ngalo perkempun tah pe ibas
kalimbubu si
ngalo
bere-bere raduken kalimbubu si ngalo perninin e biar-biaren gelah ula arah lebe ngerana?
Jababna tentu lang!
Kerina kalimbubu e situhuna pang nge ngerana, apaika nikataken nehken pasu-pasu
selaku Dibata si niteridah dingen lako nangkasken kekelengen Dibata alu
nigejapken langsung kekelengenna kempak anak beruna, kerina ia situhuna meteh
maka sentabi, kemali tah pe la meteh adat adi la beluh ngerana tah pe sumekah lako nehken kata ajar, penegu-negun
tah pe telah-telah lako si erjabu bage pe ngataken mejuah-juah raduken sangap nangdangi orangtua
si pejabuken anak.
Kalimbubu-kalimbubu e
gelarna pe ia ringan ibas teran kehamaten, maka ia pe sihamat-hamaten
sapih-sapih ia janah ibas kehamaten e me ia nehken pasu-pasuna.
”Dage, enggo seh paksa man banta teran kalimbubu si ngalo ulu emas (tah pe
si ngalo bere-bere: adi teran sinereh), uga ninta ibas kita
kalimbubu si telu-telu dalanen...” (janahna nungkun man
kaka-kakana rikutken torosen geluhna) “mehuli maka si sehken
me kehamaten man kalimbubunta, e me si tergelar kalimbubu si ngalo perkempun gelah kalimbubunta lebe erbelas nehken
pasu-pasuna?” (tah pe si ngalo perninin: adi teran si nereh). Janahna lawes kempak
ingan puang kalimbubu cinder, emaka nina: ”Ningkami
kam lebe erbelas kalimbubu kami, sehken dage telah-telahndu!” Ialoken puang
kalimbubu simada dahin e paksa ngerana, janah nina: ”Bujur ikataken kami man bandu kerina anak beru kami, si enggo nehken kehamaten
man kami lako arah lebe erbelas, tapi nina kami maka rentisndulah lebe dalan
kami, jenari erbelas kami kari ibas paksana!”, nina ka janahna nehken
penuruh gelah anak berunalah lebe si erbelas.
Seh kenca paksa erbelas
ibas kalimbubu si ngalo ulu emas e (tah pe ibas kalimbubu si ngalo bere-bere ibas teran si nereh), maka arih ka ia
sapih-sapih ia, nina: ”Uga ninta, ma
sisehken me kehamaten man kaka-katanta, sabap leben me ia ndube er-anak beru
man anak berunta asangken kita?”, janahna ka ndahi sibiak kaka-kakana
rikutken ras torosen adat. Ibas isehken kehamaten lako leben ngerana e maka
nina ka kaka-kakana: ”Enggo ialoken kami
kehamatenndu kam agi kami....mergana. Tapi sendah kam me batang ibas kita, e maka nina kami kam lah
perlebe erbelas nehken pasu-pasunndu man bere-berenta si njabuken bana bagepe
man anak berunta si pejabuken anak!”, nina ka nehken penuruhen man si biak agina, e maka arih ka me ia kerina si
biak batangna, ise ia si nehken kata si
perlebe uga maka mehuli ras metunggung. Janah kenca si e enggo lit torosenna, sikap
dalan si man bentasen kerna pengerana kerina kalimbubu seh ku puang kalimbubu e
ibas tegunna ngerana, e me bagi sienggo ndai irungguken alu runggu si gendek e,
janah ngerana me ia kerina rikutkren panggungna.
Tenah
Kata
Arah siangka maka kita
siangkan, labo si sangka-sangkan.
Adi enggo siantusi maka teran kalimbubu ibas ia menaken cakapna e, ia runggu
ncidahken ia sihamat-hamaten dingen ibas kehamatenna ia nehken kekelengenna
ibas rupa telah-telah ras pasu-pasu, maka tangkas me banta maka enda sada
perbahanen si mehuli, labo ia sidalih-dalihen, sisimbak-simbaken apai ka
sipesak-pesaken, labo!
Tidak ada komentar:
Posting Komentar