DOAH DIDONG
(Isuratken: Betlehem Ketaren)
Doah Didong, dua kata e me Doah tah pe Didong adi si gargari ibas cakap Karo
antusenna e me perbahanen sekalak si roah tah pe ngembah danak-danak ras gelah
si nioah ula ngandung, ngadi denge-denge janah gelah tunduh ibas gurung si
rembah, maka iperdiateken pe danak-danak e salu setengah rende setengah erbelas
nina si rembah: ...oah..oah, ooo...ooo, ue..ue...oah...oah!, janahna
nepuk-nepuk kundul-kundul danak-danak e. Buai,
timang sambil meninabobokkan, menidurkan, nina ibas cakap Melayu.
Doah Didong Ibas
Lakon Tumbuk Erjabu
Ibas lakon tumbuk erjabu, tupung
tegun Anak Beru Sinereh ngerana isehkenna me kekelengenna nangdangi permenna
ibas rupa telah-telah, kata ajar dingen arapen-arapen (toto) gelah tutus ate si
erjabu njabuken bana, dingen mejuah-juah, sangap encari ras cawir metua orangtua si pejabuken anak. Kenca dung Anak Beru Tua erbelas iumputi
Anak Beru Cekuh Baka bagepe Anak Beru Sepemeren, sope seh ku Anak Beru Menteri
ras ku Anak Beru Singukuri, isehken me man teran Sirembah Kulau e me tegun
turang bapa si sereh lako erbelas nehken katana.
Teran Sirembah Kulau bagi gelarna,
ia me si ndube mbaba si sereh e ku lau, si petandaken danak-danak e ku kerina ”alam semesta” arah lau dingen peridisa,
nemburisa dingen nggulasahisa gelah ula bergehen. La bo terjeng wari tupung lakon
e saja, sope tubuh pe danak-danak e, bibi-bibina
terarap-arap gelah si tubuh anak siberu, dingen kenca tubuh nina maka anak
diberu e jadi sekerajangenna. Ia si nehken gelar guna danak-danak e, ras nehken
tanggungjabapna ibas segedang-gedang paksa. Ia si arus ertanggungjabap lako
ngepkepsa, jadi ingan permenna lako ergani-gani dingen pegedang-gedang pemeteh
dingen kepentarenna gelah metunggung pe pepagin lako muat bagin ibas ia sada
tegun dingen sada rasasen si sue ras
kesemalen adat lako ras-ras ngamati kalimbubu dingen ras-ras ka dat kekelengen
ibas kalimbubu nari.
Tambah-tambah pe, tupung reh belinna batang
daging permenna e, tambah-tambah ka jadi
ate bibina sabap permenna e me si jadi gambaren dirina si mbaru niakapna, dingen nangdangi permenna e niarapknna
masin katana, lako me pagin anakna erdemu ras kalimbubu ibas pemanteken jabu si
mbaru. Emaka Doah Didong si isehken Sirembah Kulau e bagi gelarna Doah Didong
banci setengah rende setengah erbelas ras banci pe jadi setengah ngandung
erkiteken aru dingen morah atena ija erkiteken lakon tumbuk erjabu e, permenna
berkat lawes ku jabu nu kalak emaka salu la niarapna iluhna pe naktak erdire-dire naruhken kata telah si
nisehken.
Lit pe Doah Didong si megati denga
si begi ibas tep-tep kerja tumbuk erjabu, contana bagenda: ”...aku morah kal ateku pementa enda berkat ku jabu kalak, nake. Emaka
bagi sindube aku erdoah didong, ku doah didongken ka me kam sendah permen
bibina!. Doah...doah...didong...permen bibina. Enda enggo talu kepe kam sendah
bibi, kutadingken me kam ras ras impalku...mergana lako erjabu ras impalku ...
mergana enda, nindu bangku teman bibina...ia...ah...sedakna e ari...!
Doah...doah...,erpengue kal ndube ranandu nangdangi impalndu...mergana parang
anak sintua e, ari...megedang kal akap kami ras bengkilandu. E maka uga nge ningku pagi erkata kempak impalndu
...mergana si paksana erlajang bana e, anakku...ia..ah... E maka bagem permen bibina, temanku metua la surung! la gia
padanndu erdemu ras impalndu...mergana, ari... kudoah didongken ka me ka sendah
duana ras impalndu si anak kami me akap kami. (Manjar-anjar reh me duana si erjabu ku lebe-lebe si erdoah janahna ncekuh
kampilna tahpe koncangna lako nalamken ulihna latih man bibina e). “E maka bagem
beru...teman bibina, tutuslah atendu erjabu ras...mergana, kelengi pagi
jabundu, kelenglah atendu perbulangenndu terlebih-lebih pe bibi bengkilandu
bagi keleng ate kami man bandu. Doah...didong ateku keleng ateku jadi, kam pe
anakku...mergana. Sehat-sehatlah kam duana, jumpa matawari ras bulan kam.
Sangap encari ras ertuah bayak kam, seh bagi si nisura-surakenndu. ...Iyah,
enggo me yah... Bage pe kam kerina turang, eda kami si bapa dingen nande kami
kin niakap kami, doah didong turang parang anak sintua, bagepe kam turang anak
sintengah kerina ras kam turang kami parang anak si nguda ras kerina nande
kemberhen, turang kam pe mejuah-juah kam pejabuken permen kami, sehat-sehatlah
kerina dingen cawir kam metua jadi penggurun dingen si ngkelengi kami. Ertoto
ka ka lah kam kerina turang, eda...(manjar-anjar turang ras eda si erdidong ndeheri ia dingen
nalamisa dingen nehken kai si enggo icekuhna ibas gajut-gajuna nari) gelah kami pe anak berundu tetap megegeh
ndalanken dahin kami ibas kerina penuruhenndu. Sehat-sehat dingen mejuah-juah
kami kerina anak berundu. Bujur ras mejuah-juah kita kerina.”
Tujun Erdoah Didong
1.
Lako si erga-ergan. Arah Erdoah Didong, iantusken me maka Anak Beru kerina
terlebih-lebih ibas teran Sirembah Kulau, maka ia enggo latih la tampil latih
lako ngepkep kalimbubuna ibas nehken kekelengen nangdangi diri ibas jabu
kalimbubu e, janah gelah nteguh tetap kekelengen ibas kegeluhenna iarapkenna
gelah permen bibina si sereh e ula lupa
kacang kerna kulitna, tapi mesti me permen diingen anakna e nginget
bibi-bibina si la erleja-leja engkelengi ia. Ilebe-lebe tegun si empo raduken
ras kerina si pulung isehken me kata kerna uga ergana si sereh e ibas bilangen
rarasen sangkep nggeluh si sereh, alu erpengarapen maka jabu simbaru e banci
tetap ngergaken dingen pehagakensa.
2.
Lako ngergaken
Kalimbubu. Arah Erdoah Didong, itangkasken maka nterem me si rate morah
nangdangi diri kalimbubu e, dingen arusna kin erdemu. Enterem si erkeleng ate
ras mehamat kempak kalimbubu e, janah erkiteken si e iarapken maka kiniarusen
lako ngergaken kalimbubu tetap irempu kiniliten jabu si mbaru e.
3.
Lako nerusken adat
rikutken kesemalen dingen kai si enggo ipanteki nini-nini siarah lebe: utang
arus igalari, ido ialoken (endi-enta). Anak Beru ibas teran Sirembah kulau
enggo ndalanken kai si niarus ibahanna man kalimbubuna, emaka ibas tegunna e
idalankenna ka kai si jadi sekerajangenna eme hakna lako nehken kerina si lit
ibas pusuhna erpalasken kekelengenna. Erpalasken si e maka kalimbubu enggo arusna reh dingen
ngapuli Sirembah Kulau e arah toto dingen pasu-pasuna si jadi tanda-tanda kekelengenna
kempak anak beruna.
TenahTulisen
v Nina
tua-tua sidekah: ”kata me tabas, bulung-bulung si jadi tambar, jadi ningen jadi, mbera-mbera Dibata Simasu-masu”.
Ertina, kai-kai gia kitik pe adi
erpalasken kekelengen mbaba kiniulin, perlu ipetunggung dingen ipepantek guna
maba kejuah-juahen, tapi peraten Dibata pe si meganjangna dingen erpalasken
katana maka persadan jadi metunggung.
Tidak ada komentar:
Posting Komentar