Senin, 29 Oktober 2012

Turi-turin Karo, Nande nge maka Nande


Umang tertindan ku dingding jabu ras rukur sisada ngukuri pergeluhna si dem kinirison. Itadingken bapa si engggo lawes ku taneh pengulihenna, nande tep-tep wari arus kujuma nadingken ia lako muat nakan. Tep-tep wari tading me i rumah sisada, ertemanken pedah-pedah: ula megara api, meseng kari rumahta, ula ku kesain gelah ula karat biang, ula ku tapin gelah ula megulang tah ipan arimo, ula ku peken melala nipe, ula nangkih-nangkih, ndabuh kari banci penggel nahe, ras ula…ula…ras ula!

Enggo latih tan erbaba bana nggergai pintun alu gambar cikcak, enggo latih ukur ngukuri geluh bagi geluh cikcak, enggo latih lahe maba bana erdalan kujah-kuje ngkeleweti jabu, e maka tertindan me maka payo, maka sikap.

  “Andiko, uga mersikna Matawari ah, banci itemperna ijuk si mekapal, banci itembusna bayu-bayu ayo-ayo rumah enda. La banci lang ia sekalak si merawa ras erkuasa. “Bicara ia nandeku, tentu la aku mbiar kerna kai pe”, bage me ukur Umang. Metedeh kal ia ernandeken nande si lalit kebiarenna, e maka la arapna minter me isungkunna Matawari gelah nggit jadi nandena.

 “O, kam Matawari, nggit kam jadi nandeku?. Kueteh kam kalak si erdolat, merawa ras erkuasa. Ikisamkenndu rusur gelap ras iterangingu kerinana alu sinalsalndu si har-har!”. Cirem matawari ras mekuah atena Umang. “Adi bage atendu ikutken aku, kujagai kam ras keleng ateku kam!”, nina Matawari njabap sura-sura Umang.

Nusur me Umang ku kesain jenari iikutkenna Matawari lako ngalur-ngaluri dalan, juma ras dampar taneh iteruh penegu-negun Matawari, si erpengakun jadi nande Umang si mbaru e. Seh i babo Uruk, itadingken Matawari ia, sabap Matawari arus lawes ku inganna pedabuh bana ku reben si mbages seh ku kelbung-kelbungna si mbagesna kal piah enggo bene.

“Iyah, labo kap mbelin kuasa Matawari e kepe, la erdolat nangdangi uruk jine pe!, labo metunggung jadi nandeku!”, nina ka Umang ibas ukurna. E maka minter isungkunna Uruk jadi nandena.

“Uruk, kam kap si erdolat nangdangi Matawari si kuakap kin erkuasa ras merawa. Adi meriah ukurndu, kam ateku jadi nandeku!”, Ituriken Umang ka kerna Manusia nandena si melala kal kelemahenna, e maka mekuah ate Uruk man bana janah erpengue ia jadi nande Umang. Meriah kal ukur Umang e maka isiar-siarina me Uruk e alu ergiah-giah ukurna.

Seh ku sada ingan, jengang Umang ngidah uga Kerbo alu megegeh nepah ras nontarken Uruk. “Nande, uga kam iban Kerbo enda, merimpuk ras getem kam ibahanna!”, nina Umang. “Nangdangi Matawari tuhu erdolat aku, tapi la aku ergegeh kempak Kerbo. Ate-atena me nnggetemken ras ngerimpukken aku”, nina ka Uruk alu manjar-anjar. “Ih, adi bage, lapadah surung kam jadi nandeku!”, nina Umang janahna lawes ndahi Kerbo.

“Kerbo, kam kepe si merawana, la kap erdolat Uruk ilebe-lebendu, sura-surangku…, adi meriah ukurndu kam min jadi nandeku, lanai ateku si deban!”, nina Umang alu merendeh.

“Ukurkenlah manjar-anjar Umang, ula kari mobah-obah lalap ukurndu. Aku tuhu erkuasa ras erdolat nangdangi Uruk, tapi sitik pe la aku erdolat nangdangi Tinali. Kentisik nari idahndu me aku itarik Tinali kuja atena babana kuje arus aku ngikur-ngkur”, nina Kerbo alu tangkas ras bujur. “Lang, labo tuhu, kam me sikudarami labo sideban!”, nina Umang alu meseksek. “Kamlah ngukurkensa, adi payo bage atendu, aku pe meriah nge ukurku!”, nina Kerbo.

Erburak ka ukur Umang sabap atan pemindonna, tapi la ndekah ngidah uga persui  ate Kerbo irintak-rintak Tinali dingen mabasa kujah-kuje bagi ate-atena, tangkas me man Umang maka la lit kuasa, rawa ras dolat Kerbo nangdangi Tinali si kitik jine pe, e maka minter erpenulak ukurna. Alu la ngata cuan, sinik-sinik itadingkenna Kerbo nandena ras idaramina paksa si tengteng lako nungkun Tinali jadi nandena.

“O Tinali, kam me si erdolat, si merawa ras si erkuasana kap kepe. Enggo kuidah uga perbahanenndu nangdangi Kerbo si erkuasa nangdangi Uruk si meganjang. Adi meriah ukurndu, kamlah jadi nandeku!”, nina Umang alu mindo.

“Ukurken manjar-anjar Umang, petetaplah ukurndu. Aku tuhu erkuasa nangdangi Kerbo, tapi nangdangi Menci la lit kuasaku. Mbiar kal aku ngidah Menci sabap ntelap kal ipenna ras asa ikeretna retap me aku!”, nina Tinali alu tuhu dingen tengteng. Tapi la tek Umang, e maka alu meseksek ka ipindona, piah Tinali pe lanai beluh ersumekah.

Jenari iidah Umang me uga kata nandena Tinali e  jadi. Tupung manjar-anjar reh menci, ikaratina me Tinali seh sar-sar ibahanna. Ngidah-ngidah si e turah ka me ukur Umang nungkun Menci jadi nandena.

“Menci, kam ateku jadi nandeku, enggo kuidah uga kuasandu nangdangi Tinali si erdolat nangdangi Kerbo. Ilebe-lebendu labo kai pe ertina Tinali janah sar-sar mis ibahanndu!”, nina ka Umang muji-muji Menci gelah nggit jadi nandena. “Kam lah ngukurkensa, adi payo akapndu aku jadi nandendu, ikutken aku!”, nina Menci alu la mbue ngerana. Erburak me ukur Umang tapi la ndekah. Tupung jumpa ras Kucing minter lompat berteng Menci sabap ceda kal jantungna ras mbiar kal ia mate. Natap-natap perlompat berteng Menci minter kal sambar ukur Umang ras minter ka isungkunna Kucing gelah nggit jadi nandena.

Sope ngerana Umang, minter erbelas Kucing sabap enggo iangkana ukur Umang. “Umang, enggo ndauh dalan sinidalanindu, oratna min enggo tangkas ietehndu maka la lit si serta ibabo kendit enda. Kerina kalak lit me kelebihenna janah lit ka kekurangenna. Adi aku, labo lit pandangenku nangdangi nandendu si Manusia e. Ikepkepna kam asa ukurna lit bage pe aku. Iberena ampunna jadi inganku erlolah-lolah janah isikapkenna pe nakanku. Adi nangdangi aku si la anakna pe ibahanna perbahanen-perbahanen si dem kiniulin tentu lebihen kang ibahanna nangdangi kam si anakna kin. E maka…, adi ningku…”.

Langa dung Kucing ngerana pe minter sedar me Umang nangdangi kuasa, dolat ras rawa nandena, si e kerina teridah dingen tergejap kap ibas tempas kekelengenna. “Iasaken nande nahanken kiniseran, ngalaken kebiaren ras ngampang-ngampangi bana ibas penerpan kerina kinirison gelah banci aku terkelin kap!. Oh nande nge maka nande!”, nina Umang janahna mulih ku rumah ndahi nandena alu erburak tuhu-tuhu ukur ras kekelengenna.

Mulihi Isuratken ras ibunga-bungai, Betlehem Ketaren.
Ermeriah ukurlah si rumah denga Nande Kekelengenta, banci denga itami-tami asa ukurta lit. (Si lanai rumah, mari sitotoken).

Tidak ada komentar:

Posting Komentar