Sabtu, 17 November 2012

TURI-TURIN KAK TANGKO BUNGA (Jakub Tarigan)




Lit me sekalak diberu tua-tua. Lit sada bungana man guro-guro kempu-kempuna.
Sekali ku lau ia, itangko kak bunga e. Kabang kak das kayu. Idarami tua-tua enda
bunga e. Idahna enggo ibabaken kak ku das kayu.
E maka nina, "Kak, kak, littangkongko bungaku?"

"Apai?" nina kak.

Idahina eltep. Nina man eltep, O, eltep, eltep sitik kak, kak tangko
bungangku!

"Apai?" nina eltep.

Lawes ia idahina piso, Nina man piso, "O, piso, gat-gat sitik eltep, eltep si la
nggit ngeltep kak, kak tangko bungaku!

"Apai?" nina Piso.

Jenari lawes ia njumpai api. Nina man api: “O, api, api, lebur sitik piso, piso
si la nggit nektek eltep, eltep si la nggit ngeltep kak, kak tangko
bungangku!

"Apai?" nina ka api.

Idahina lau. Nina man lau, "O, lau, lau nimpeti sitik api, api si la nggit
ngelebur, ngelas piso, piso si la nggit nektek eltep, eltep si langgit ngeltep
kak, kak tangko bunganku!"

"Apai", nina ka lau.

Idahina ka uruk. Nina man uruk, Tombeng sitik lau, lau si la nggit nimpeti
api, api si la nggit ngelebur piso, piso si la nggit nektek eltep, eltep si la
nggit ngeltep kak, kak tangko bungaku!

"Apai?", nina ka uruk.

Idahina kerbo. Nina man Kerbo, "Ragas sitik uruk-uruk si la nggit ngegas uruk,
uruk sila nggit nombeng lau, lau si la nggit nimpeti api, api si la nggit
ngelebur piso, piso si la nggit nektek eltep, eltep sila nggit ngeltep kak, kak
tangko bunganku"

"Apai?" nina kerbo.

Idahina ka erpo, nina man erpo, "O erpo, erpo, rangke sitik kerbo, kerbo si la
nggit ngegas uruk, uruk si la nggit nobeng lau, lau si la nimpeti api, api si la
nggit ngelas piso, piso si la nggit nektek eltep, eltep si la nggit ngeltep kak,
kak tangko bungangku!"

"Apai", nina erpo

Idahina menci. Nina man menci, O menci, menci, ketep sitik erpo, erpo si la
nggit ngerangke kerbo, kerbo si la nggit ngegas uruk, uruk si la nobeng lau, lau
si la nggit nimpeti api, api si la nggit ngelebur piso, piso si la nggit nektek
eltep, eltep si la nggit ngeltep kak, kak tangko bungangku!”

"Apai?" nina menci.

Lawes ka ia ndahi kucing. Nina man kucing, O kucing, kucing, pan sitik menci,
menci si la nggit ngeltep erpo, erpo si la nggit ngerangke kerbo, kerbo si la
nggit ngegas uruk, uruk si la nggit nobeng lau, lau si la nggit nimpeti api, api
si la nggit ngelengas piso, piso si la nggit nektek eltep, eltep si la nggit
ngeltep kak, kak tangko bungaku!"

"Ue", nina kucing erkiteken ia sangana melihe kal.

Reh nina menci, "Ola aku ipan, kuetep gia erpo".

"Ola aku iketep, kurangke gia kerbo", nina erpo.

"Ola aku irangke, kuegas gia uruk", nina kerbo.

"Ola aku iegas, kutembeng gia lau", nina uruk.

“Ola aku itombeng, kunimpeti gia api," nina lau.

"Ola aku nimpeti, kulebur gia piso", nina api.

"Ola aku ilebur, kutektek gia eltep", nina piso.

"Ola aku itektek, kueltep gia kak, kak tangko bunga", nina eltep.

"Ola aku ieltep kuulihken gia buga", nina kak. Emaka iulihken kak bunga, tapi
enggo erkubang-kubang.

Tidak ada komentar:

Posting Komentar