Kanam-kanam: ...Aku La Gia Masuk Surga!

Katekis: “Lapurken bandu man porhanger ah mami tua, maka ikut kam jadi itangkuhken jadi katekumen ibas tahun enda!”

Nini Nitakitakis: “Kai kin katekumen e, tongat?”

Katekis: “Kalak si erlajar ibas Gerejanta. Ije kam iajari erbahan Tanda Silang, Toto Bapa Kami, Sintabi Maria ras Kemuliaan rikut ras kesemalen bage pe ketentun-ketentun Gereja. Adi enggo pagi iangkandu kerina maka banci kam iperidiken!”

Nini Nitakitakis: “Aku enggo metua tongat, lanai bo aku ngasup jadi pertua!”

Katekis: “Labo gelah jadi pertua, mami tua! Adi kam enggo metua, labo totonta, adi ku jah pe kam pepagi banci kam masuk surga!

Nini Nitakitakis: “Adi erlajar ras iperidiken, masuk surga…Adi la erlajar  ras la iperidiken la masuk surga, ma bage tongat?”

Katekis: “Ue mami tua, e maka lapurkenlah bandu maka kam erlajar ras iperidiken me pagin, gelah masuk surga!

Nini Nitakitakis: “E la padah aku erlajar, la padah aku iperidiken gelah ula masuk surga!

Katekis: “Engkai mami tua?”

Nini Nitakitakis: “Aku keleng kal ateku mama tuandu ndube ras ia pe melias kal ndube bangku. Nina ndube nangdangi ia berkat maka leben ia pesikap ingan bangku. Ia ndube la erlajar ras la iperidiken tentu la ia masuk surga. Adi erlajar kari aku ras iperidiken janah masuk surga, ma lanai kami kari jumpa, tongat! Ija kekelengenku e?!”

Katekis: ?!?! (BK).

Kanam-kanam: “Suruh min panna kotorna...”

Bung Key, bagi gelarna ia sekalak perbapan si genduari. Pultak kenca matawari, minter katepes ia kujah-kuje ibaba sura-surana gelah min geluhna banci terulin, terulin ras terus terulin! Lain kal ras silihna Bang Kar gelarna,  gedang-gedang wari ersatur ngenca dahinna i kede kopi janahna nganggar-nganggarken motor si mbaru itukurna dingen nganggarken merek motorna e ”Ulih Latih Beru Karo Si Melias Merambit” si galang ras mesilau suratna ibahanna i kaca lebe.

Bas ciger-ciger wari tupung ku rumah man Bung Key, sengget kal ia idapetina anakna Sen Endi gawah lalap, gia enggo erbage-bage tambar itambarkenna tapi gawah anakna lalap la ngadi. E maka ibabana me atena ku Rumah Sakit si Sen Endi, tapi erkiteken motor la lit paksana ngadi-ngadi i kuta seakatan motor silihna e, gia kemer akapna, nokoh akapna silihna e erkiteken pediat turangna sekalak jine ku juma erbintuas, bage gia ipala-palaina me nungkun motor silihna Bang Kar e.

Bung Key: ”O Bang Kar, permenndu Sen Endi gawah lalap, otalah sibaba ku Rumah Sakit!”

Bang Kar: ”Uga kin pertembehna permen e?” (sss..., sss...usur-surna pemurjah kudana).

Bung Key: ”Kudapeti ndai gawah ia, kubere tambar kede, tambar kede e kang ndarat..., kubere ka biskuit gelah ula lume beltekna ateku, biskuit ka ndarat, gawah ia lalap!”.

Bang Kar:  “...iyah..., mate nge sekale e..., iusur-usurna pedalin buah saturna, gia kalak enggo jengang kerina) ”Bagi piduk kap e, silih, panna tomat, tomat ka buangkenna, panna buah ndokum, buah ndokum ka ibuangkenna, suruh min panna kotorna...”.

Bung Key: ”Adi la atem nampati ngata ko, totom pe kuidah la mehuli!”

Jelma si enterem: “Ula kena rubat, ota sibaba ku Rumah Sakit. Adi sakit i tambari, labo isuruh man kotorna!” (BK).

Kanam-kanam: Radu-radu Pais!

“...Erkite-kiteken bagi si enggo tangkas banta enggo ndeher matana wari pemilihen, reh ka me kami bapa, nande ku kutanta enda. Bagi bapa-bapanta pejuang si enggo pepantek negaranta enda, bage me maka kita pe arus berjuang!. Udan tah pe las si nderngit, suari tah pe berngi, susah ras mesera idalani pejuang ibas ia berjuang. E maka kita pe kerina nande, bapa, senina ras turang arus berjuang!”, nina ka Tim Sukses nehken semangat juangna.

“Payo kal kuakap katandu ena, bapa.  E maka,  ija dage berjuang e, enggo ndai nari kami ertima, e me lako berjuang!”, nina sekalak pernanden erbelas nehken kata pusuhna.

”Ue, nande ulanai kam tertaren-taren, ula ertima-tima, bagi pernanden siadi pesikap dapur umum, pesikap uis pejuang bagepe kai siperlu man pejuang, e me gelarna berjuang!”, nina ka Tim Sukses.

”Em kap maka bage ningku nakku, aku pe kueteh me tanggungjababku, maka mingku ija dage berjuang e: BERas, baJU ras uANG?!”. (BK).

Kanam-kanam: Lalap La Sahun

 

Genduari enda nterem kal anak perana pangke raduken ras singuda-nguda pe enggo pangke lalap lenga sahun erjabu. Sungkun kujah siksik kuje, kepeken reh pangkena anak perana bage pe reh pangkena singuda-nguda, kepeken reh susahna jumpa atena ngena, labo erkiteken joduna enggo ndelisken bana tah pe nggulangken bana deba, tapi erkiteken enggo mbagessa pengukurina kerna calon pasangenna. Nehenlah temanta si Ringut ras si Berjut enda umapama.

Ringut: ”Aku enggom tutus ateku bandu, Jut, kam uga ukurndu?”

Berjut : ”Adi nggit kam ngaloken aku bagi litna, aku pe meriah nge ukurku!”

Ringut: ”Adi banci, enggo gia kita surung pagi, gajiku tetap min tetap sekerajangenku, ulihndu ertiga-tiga tetap ka sekerajangenndu...e pe adi meriah ukurndu!, uga akapndu, Jut?”

Berjut : ”Labo dalih bang, tapi kai pe si jumpa kita kenca kita erjabu ma sibagi dua?”

Ringut: ”Ue, uelah cocok bagi katandu ena! (Sinik kentisik). Egia, dung kenca kerjanta pagi, seh i kutangku, itengah dalan jumpa kita kotor lembu, e pe pagi ma mis sibagi dua?!”

Berjut : ”Eee, lang! Lo tuhu katandu ena!

Ringut: ”E lapadah surung adi bagena! Kotor lembu pe atendu bandu kerina! Merangap  kam tuhu-tuhu kepe!(BK).

HP Mbaru Pertua Mbaru

Seksi liturgi si mbaru, erbahan roster si mbaru, maka pertua-pertua si mbaru arus ipelebe ertugas ibas tahun si mbaru.  Erkiteken Hp-na mbaru, maka ibanna sekalak pernanden jadi peminpin utama lakon e.  Iburakenna Hp-na janah tamana kubas tentenna.  Nina ibas ukurna, pertua labanci jegir e maka cukup cidahken man kalak nalina saja, e pe enggo ieteh kalak merekna “No Kila”.  Sikap kel babana lakon e, tapi tupung ibenakenna nuri-nuri, sengget kel ia janahna ersumpah: ”Mate kal engkoo ya,.. ise si engkuit tentenku?” Nen na kawes kemuhen, tapi siidahna kerina kalak kemamangen.  Kepeken lit sierlebuh arah Hp-na, meger nggirgir Hp-na erbahan megamang akapna.  Ha...Ha...Haa! (BK).